काठमाडौ,
हालका दिनहरुमा विभिन्न संचार माध्यममा सशस्त्र प्रहरी ऐनको मस्यौदा लगायत दुई वटा गाडीमा तीन महिनामा ६ करोड रुपैयाँको इन्धन खर्च भएको तथा सशस्त्र प्रहरी बल, नेपालको फायल गृहमन्त्रालयले फिर्ता पठाएको भन्ने जस्ता विभिन्न कुराहरुमा तथ्यभन्दा बाहिर गई प्रकाशित भएको समाचारप्रति सशस्त्र प्रहरी बल, नेपाल प्रधान कार्यालयको गम्भिर रुपमा ध्यानाकर्षण भएको छ ।
मस्यौदाको रुपमा रहेको सशस्त्र प्रहरी ऐनको बारेमा समाचार प्रकाशित गर्दै सशस्त्र प्रहरी बल, नेपालको विभिन्न अधिकार थप गर्न खोजिएको भनि उल्लेख गरेको पाईएको छ । जुन अधिकार हालकै सशस्त्र प्रहरी ऐन तथा नियमावलीमा रहेको व्यहोरा स्पष्ट पारिएको छ । सशस्त्र प्रहरी बल, नेपाललाई हाल प्राप्त अधिकार क्षेत्रबारे जानकारी नै नलिई नयाँ बन्ने ऐनमा अधिकार थप्न लागेको भनि समाचार प्रकाशित हुँदा पाठकवर्गमा भ्रम सृजना हुने भएकोले सोबारे स्पष्ट पारिएको छ ।
यसैगरी इन्धनको कूल बजेट रकमबारे जानकारी नै नलिई दुई वटा गाडीमा मात्रै तीन महिनाको अवधिमा ६ करोड रुपैयाँको इन्धन खर्च भएको भनि संचार माध्यममा समाचार प्रकाशित भएको छ । जुन कुरा पूर्णरुपमा झुट्टो तथा काल्पनिक हो ।
यसैगरी संगठनको दरबन्दी थप गर्नको लागि सशस्त्र प्रहरी बल, नेपालबाट हाल कुनै पहल नै नभएको व्यहोरा स्पष्ट पारिएको छ ।
हालका दिनहरुमा सशस्त्र प्रहरी बल, नेपालको विषयमा विभिन्न संचार माध्यममा झुट्टा, कपोकल्पित तथा काल्पनिक समाचारहरु प्रकाशित भएको पाईएको हुँदा यस्ता समाचारबाट आम नागरिकमा भ्रम सृजना हुनुका साथै सुरक्षाकर्मीको मनोबलमा समेत असर परी समग्र शान्तिसुरक्षा तथा सुशासन कायम गर्ने कार्यमा नकारात्मक असर पर्न सक्ने भएको हुँदा समाचार प्रकाशनपूर्व सशस्त्र प्रहरी बल, नेपालका प्रवक्ता वा सूचना अधिकारीबाट समाचार पुष्टी गराउनेतर्फ ध्यान पु¥याउनु हुन आग्रह गरिएको छ ।
साथै विभिन्न संचार माध्यममा प्रकाशित भएका तथ्यहिन समाचारबाट भ्रममा नपर्नु हुन आम पाठकवर्गमा अनुरोध समेत गरिएको छ ।
