काठमाडौं,
झापा जिल्लाको मेचीनगर नगरपालिका ६ स्थित बसपार्क ईलाकाबाट असार ९ गते एपीएफ टोलीले करीब २ लाख ७३ हजार रुपैयाँ बराबरको चोरीपैठारीको लत्ताकपडा र विभिन्न किसिमको औषधी बरामद गरेको छ ।
भारतबाट अवैध रुपले ल्याउँदै गरेको उल्लेखित सामान सशस्त्र प्रहरी बल, नेपाल नम्बर ८ गुल्म झापाबाट खटिएको एपीएफ टोलीले बरामद गरेको हो ।
बरामद सामान आवश्यक कारवाहीको लागि स्थानीय भन्सार कार्यालयमा बुझाईएको छ ।
यसैगरी धनुषा जिल्लाको नगराईन नगरपालिका ७ स्थित बिर्ताबाट असार ८ गते एपीएफ टोलीले करीब १ लाख २० हजार रुपैयाँ बराबरको चोरीनिकासीको मरिच बरामद गरेको छ ।
मोटरसाइकलमा राखेर भारततर्फ लैजाँदै गरेको अवस्थामा उल्लेखित मूल्य बराबरको करीब तीन सय के.जी. मरिच सशस्त्र प्रहरी बल, नेपाल बोर्डर आउट पोष्ट देवडियाबाट खटिएको एपीएफ टोलीले बरामद गरेको हो । त्यसवेला उक्त मरिच लैजाँन प्रयोग गरिएको तीन वटा मोटरसाइकल समेत एपीएफ टोलीले बरामद गरेको छ ।
बरामद मरिच तथा मोटरसाइकल आवश्यक कारवाहीको लागि स्थानीय भन्सार कार्यालयमा बुझाइएको छ ।
यसैगरी सुनसरी जिल्लाको कोशी गाँउपालिका १ लौकहीस्थित सीमा ईलाकाबाट असार ७ गते एपीएफ टोलीले करीब एक लाख मूल्य बराबरको चोरीपैठारीको रोटाभेटर बरामद गरेको छ ।
भारतबाट अवैध रुपले भन्सार छलेर नेपालतर्फ ल्याउँदै गरेको अवस्थामा सशस्त्र प्रहरी बल, नेपाल बोर्डर आउट पोष्ट लौकहीबाट खटिएको एपीएफ टोलीले उक्त रोटाभेटर बरामद गरेको हो ।
बरामद रोटाभेटर आवश्यक कारवाहीको लागि स्थानीय प्रहरीमा बुझाइएको छ ।
